माननीय चेअरमन
प्रिय उद्योजक सभासद बंधु आणि भगिनींनो,
सप्रेम नमस्कार,
प्रथमता सिन्नर तालुका औद्योगिक सहकारी वसाहतीचे शिल्पकार स्व. नानासाहेब गडाख आणि त्यांचे खंदे समर्थक स्व. किसनराव चव्हाणके व स्व. प्रकाशशेठ शहा या संस्थापक त्रिमुर्तींना विनम्र अभिवादन...!
आपल्या सर्वांच्या हिताचे रक्षण आणि संवर्धन करणाऱ्या आपल्या संस्थेचा सन 2025-26 या आर्थिक वर्षाचा 44 वा वार्षिक अहवालाच्या प्रसंगी आपल्याशी संवाद साधताना मला विशेष आनंद होत आहे.
मित्रहो, अत्यंत प्रतिकुल परिस्थितीतून प्रवास करणाऱ्या आपल्या संस्थेने आज जे प्रगतीचे शिखर गाठले आहे, ते आजपर्यंतचे संचालक मंडळ, सभासद आणि कर्मचाऱ्यांच्या एकत्रित प्रयत्नांचे फलित आहे. त्याचबरोबर आपले प्रेम आणि शुभेच्छा यांचे जोरावर सन 1999 पासून आजपर्यंत मी सतत या संस्थेवर वेळोवेळी संधीनुसार संचालक, चेअरमन, व्हा. चेअरमन म्हणुन काम केले आहे. दि.07/08/2026 रोजी पुन्हा एकदा सर्व संचालकांनी माझ्यावर विश्वास दाखवत एकमताने माझी संस्थेच्या चेअरमन पदी निवड केली. आपण सर्वांनी टाकलेल्या विश्वासाला तडा जाणार नाही याचे भान ठेऊन आजपर्यंत काम केले आहे. त्यातूनच सभासदाचे हित सांभाळण्याची भुमिका नेहमीच घेतली आहे आणि यापुढेही घेत राहणार आहे.
उद्योजक सभासद हाच खरा या संस्थेचा आत्मा आहे असे आम्ही सर्व संचालक मानतो. कारण उद्योजक नसेल तर या संस्थेच्या अस्तित्वाला अर्थच नाही. त्यासाठी या संस्थेच्या माध्यमातून सभासदाचे हिताला बाधा येणार नाही, सभासदांना त्यांचा उद्योग चालविण्यास कोणत्याही प्रकारचे अडथळे येणार नाही याची दक्षता घेणे हे संस्था चालकांचे प्रमुख कर्तव्य आहे. उद्योजक सभासदांनी त्यांचे उद्योग वाढीसाठी प्रयत्न करावेत आणि संस्थेने उद्योजक सभासदांना शक्य तेवढी मदत करावी म्हणजे खऱ्या अर्थाने उद्योग वाढीच्या संस्थेच्या उद्देशाशी निगडीत काम होते असे म्हणता येईल आणि त्याच पद्धतीने आम्ही काम करण्याचा प्रयत्न केलेला आहे.
माझी सर्व संचालकांच्या वतीने सर्वांना विनंती आहे कि, आता आपल्याला संस्थेविषयी, संस्थेच्या कार्यालयाविषयी आणि कार्यालयात काम करणाऱ्या कर्मचाऱ्यांविषयी आत्मीयता वाढेल अशा प्रकारचे काम करण्याचे निर्देश आम्ही दिले आहेत.
यापुढे झाले-गेले सर्व विसरून, आपण सर्व एकमेकांबरोबर प्रेमपुर्वक, सन्मानपुर्वक वागुन स्वतःसह आपल्या संस्थेची भरभराट होईल या दृष्टीने वाटचाल करुया.
यापुढील हे वर्ष आम्ही ‘उद्योजक सन्मान वर्ष’ म्हणुन कामकाज करणार आहोत. छोटा-मोठा असा भेदभाव न करता सर्वच सभासदांना यापुढे सन्मानाची वागणुन दिली जाईल, उद्योजकांच्या अडी-अडचणी समजुन घेऊन त्या सर्व सोडविण्याचा आम्ही सर्व संचालक मंडळ कसोशीने प्रयत्न करू. सभासदांनी देखील संस्था व संस्थेच्या कर्मचाऱ्यांबरोबर त्याच भावनेने एकरूप होऊन सहकार्य करावे. शेवटी “एकमेका सहाय्य करु अवघे धरू सुपंथ” हाच खरा सहकाराचा मंत्र आहे. तो प्रमाणित मानुन आपण सर्वजण खांद्याला खांदा लावुन उत्कर्षाच्या दिशेने वाटचाल करूया.
वचनपुर्तीच्या दृष्टीने शक्यतो बरीच कामे झाली आहेत, काही कामे प्रस्तावित आहेत. उर्वरीत कामे कशी मार्गी लावता येतील यासाठी मनापासुन प्रयत्न करू. माझे सर्व सहकारी संचालक, तसेच धडाडीचे व्हा. चेअरमन मा.प्रमोदजी महाजन साहेब यांना बरोबर घेऊन जे-जे शक्य आहे, ती सर्वच कामे करण्याचे आमचे प्रयत्न राहतील.
सद्यस्थितीत CETP प्रकल्प, रस्ते ही मुख्य कामे दृष्टीक्षेपात आहेत. त्यासाठी मा.खासदार श्री.राजाभाऊ वाजे आणि मा.आमदार श्री.माणिकराव कोकाटे यांचे माध्यमातून त्या कामांचा पाठपुरावा करून तीही कामे होतील असे प्रयत्न करू. परंतू त्यासाठी हवी आहे आपली भक्कम साथ, सदिच्छा व शुभेच्छा. धन्यवाद..!
झाडे लावा... झाडे जगवा... पर्यावरण वाचवा...
PLANT TREES... SAVE TREES.... SAVE THE ENVIRONMENT......
