माननीय चेअरमन यांचे मनोगत

सन्माननीय उद्योजक मित्रहो,
नमस्कार,

सिन्नर तालुका औद्योगिक सहकारी वसाहत मर्या., सिन्नर (स्टाईस) ता. सिन्नर, जि. नाशिक या संस्थेची संचालक मंडळ पंचवार्षिक निवडणुकीत दि.२७/०७/२०२२ रोजी चेअरमन, व्हा. चेअरमन पदाची निवड होताच आम्ही सत्ताधारी विद्यमान संचालक मंडळाने स्टाईस संस्थेच्या कामकाजाची सुत्रं हाती घेतली व संस्थेचा सर्वांगिण औद्योगिक विकास व सभासदांचा वैयक्तिक आर्थिक विकास करण्याचे अंतिम ध्येय निश्चित करुन कामाला लागलो आहे. गेल्या १४ महिण्यांत आम्ही करत असलेल्या संस्थेच्या प्रत्यक्ष कामकाजावरुन ही बाब सर्व सभासदांना स्पष्टपणे दिसुन येत असल्याचे बहुसंख्य सभासद समक्ष भेटीत आमचेबरोबर चर्चा करत आहे.

आज नाशिक जिल्ह्यात अंबड (B Zone), सातपुर (B Zone), गोंदे-इगतपुरी (D Zone), दिंडोरी - पालखेड (D Zone), अतिरिक्त दिंडोरी अक्राळे तळेगाव (D Zone), मालेगाव (CZone), अतिरिक्त मालेगाव (CZone), पेठ (DZone), येवला (D Zone), विंचुर (C Zone), अतिरिक्त विंचुर (C Zone), माळेगाव-सिन्नर (C Zone) असे एकुण १२ औद्योगिक क्षेत्र नाशिक जिल्ह्यात महाराष्ट्र औद्योगिक विकास महामंडळाने (MIDC) विकसीत केलेले असुन त्यात आपल्या सिन्नर सहकारी औद्योगिक वसाहतीचे (C Zone) मोठे औद्योगिक क्षेत्र देखील उपलब्ध आहे. यामुळे नाशिक जिल्ह्यात नव्याने उद्योग सुरू करण्यासाठी जिल्ह्या बाहेरुन येणाऱ्या नवीन उद्योजकांस आज औद्योगिक क्षेत्राची निवड करण्यासाठी असंख्य पर्याय उपलब्ध झाल्याने नाशिक जिल्ह्यात औद्योगिक क्षेत्राची निवड करण्यासाठी स्पर्धा निर्माण झाली आहे. औद्योगिक क्षेत्र निवडीच्या या स्पर्धेत आपली सिन्नर सहकारी औद्योगिक वसाहत नेहमीच अव्वल राहण्यासाठी आपली औद्योगिक वसाहत उद्योग उभारणीसाठी एक उत्तम क्षेत्र आहे. अशा पायाभुत सुविधा निर्माण करून भविष्यात आपल्याला उद्योगांसाठी लागणाऱ्या गुणवत्तेच्या आधुनिक स्वरूपाच्या पायाभुत सोयी-सुविधा संस्थेच्या कार्यक्षेत्रात तात्काळ निर्माण करून द्याव्या लागणार आहे. त्याशिवाय नवीन येणारे उद्योजक आपल्या औद्योगिक वसाहतीची सहजा सहजी निवड करणार नाही, ही वस्तुस्थिती आहे.

परंतु सभासद मित्रहो, सत्ताधारी विद्यमान संचालक मंडळाने या सर्व बाबींचा अतिशय दुरदृष्टी ठेऊन पहिल्या दिवसापासुन संस्थेच्या कार्यक्षेत्रातील सर्व प्रकारच्या गुणवत्तेच्या अत्याधुनिक पायाभुत सुविधा निर्माण करण्यासाठी कामकाज सुरू केलेले आहे. त्याचबरोबर आपल्या सहकारी औद्योगिक वसाहतीचे प्रशासकीय कार्यालय मुंबई, पुणे, ठाणे या मोठ्या औद्योगिक शहरांतील Corporate कार्यालयाच्या धर्तीवर, आधुनिक सुविधांसह Corporate Look असणे आवश्यक असल्याने यासाठी देखील आपण संस्थेच्या प्रशासकीय कार्यालयात आवश्यक ते बदल करून आधुनिक पद्धतीची रंगरंगोटीचे कामकाज पूर्ण केले आहे. तसेच भविष्यात देखील सभासदांना संस्थेबरोबर प्रशासकीय कामकाज करतांना ऑनलाईन पद्धतीने जोडले जाऊन संस्थेचे कामकाज पेपरलेस करण्याच्या दृष्टीने वेब बेस सॉफ्टवेअर विकसीत करून, सभासदांच्या सोयीसाठी विविध अ‍ॅप तयार करुन सभासदांच्या सेवेत दाखल केले आहे. संस्थेत नविन येणाऱ्या उद्योगांसाठी जमिन उपलब्ध करून देण्याच्या उद्देशाने संस्थेची शाखा विस्तार करण्याचा प्रश्न विद्यमान संचालक मंडळाच्या विचाराधीन असून नजीकच्या कालावधीत यावर कृती होईल असे कामकाज सुरु आहे.

आम्ही सत्ताधारी विद्यमान संचालक मंडळाने निवडणुकीत सभासदांना दिलेली २१ आश्वासने पूर्ण करण्यासाठी दि. २७/०७/२०२२ पासुन अविरतपणे कामाला लागलेलो आहे. बोलता-बोलता फक्त १४ महिण्यांच्या कालावधीत एकुण २५ कामे करण्याचा निर्णय घेतला असुन त्यापैकी २१ कामे प्रत्यक्षात साईटवर पुर्ण करून आपणास दिलेल्या आश्वासनांची पुर्ती देखील केली आहे, उर्वरीत ०४ कामे आजमितीस प्रगती पथावर असून लवकरच पुर्णत्वास येतील.